ඕමාන් ගල්ෆ් කලාපයේ ඉන්ධන නෞකා දෙකක පිපිරීම් සම්බන්ධයෙන් අමෙරිකාව ඉරානයට චෝදනා කර ඇත.
විදෙස් මාධ්‍ය වාර්තා කළේ ඊයේ (13) ඇති වූ සිද්ධියෙන් පසුව ඉන්ධන මිල 4.5%කින් ඉහළ ගොස් ඇති බවයි.
ඕමාන් ගල්ෆ් කලාප මුහුදේදී ඉන්ධන ප්‍රවාහනය කරමින් තිබූ නෞකා දෙකක් තුළ සිදුවූ පිපිරීම්වලින් අනතුරුව එහි සිටි කාර්ය මණ්ඩල සාමාජිකයින් මුදා ගැනීමට කටයුතු කළේය.
අදාළ නෞකා හිමිකාර සමාගම් පැවසුවේ, කොකුකා කරෙජස් නෞකාවේ සිටි කාර්ය මණ්ඩල සාමාජිකයින් 21 දෙනෙකු සහ ෆ්‍රන්ට් ඇල්ටෙයාර් නෞකාවේ සිටි කාර්ය මණ්ඩල සාමාජිකයින් 23 දෙනෙකු එලෙස මුදාගෙන ඇති බවයි.
මෙම පිපිරීම්වලට හේතුව මෙතෙක් අනාවරණය වී නැත.
මෙම සිදුවීම වාර්තා වූයේ, එක්සත් අරාබි එමීර් රාජ්‍යය ආසන්න මුහුදේදී ඉන්ධන ප්‍රවාහන නෞකා 4කට ප්‍රහාරයක් එල්ල වී මසක් ගතවීමෙන් පසුවයි.
මෙම ප්‍රහාර පිටුපස ඉරානය සිටින බවට ඇමෙරිකාව චෝදනා කරයි.
කෙසේ වෙතත්, ඉරානය එම චෝදනා ප්‍රතික්ෂේප කර තිබුණි.
මෙම ප්‍රහාර හේතුවෙන් ඕමාන් ගල්ෆ් කලාපය සම්බන්ධයෙන් ඉරානය සහ ඇමෙරිකාව අතර දීර්ඝ කාලයක් පුරා පවතින අර්බුදය උත්සන්න වී ඇත.
ජනාධිපති ඩොනල්ඩ් ට්‍රම්ප් යටතේ ඇමෙරිකාව ඉරානයට එරෙහිව දැඩි ප්‍රතිපත්තියක් අනුගමනය කරමින් සිටින අතර ඔවුන් චෝදනා කරන්නේ, මැද පෙරදිග අස්ථාවර කිරීමට ඉරානය ක්‍රියා කරන බවටයි.
එම මුහුදු කලාපයේ ඇමෙරිකා ආරක්ෂක බළකායන්ට ඉරාන හිතවාදී හමුදාවලින් ප්‍රහාරයක් එල්ල විය හැකි බව පවසමින් පසුගිය මැයි මාසයේදී ඇමෙරිකාව ගුවන් යානා ප්‍රහාරක කණ්ඩායමක් ද පිටත් කර හැරියේය.
ඉරානය ඇමෙරිකාවේ ප්‍රකාශ ප්‍රතික්ෂේප කළ අතර ඔවුන් ඇමෙරිකාව ආක්‍රමණශීලී ලෙස හැසිරෙන බවට චෝදනා කළේය.