විදෙස් මාධ්‍ය වාර්තා කළේ ඉන් මියගිය පිරිස සිහිපත් කර එරට තුළ සැමරුම් රැසක් සංවිධානය කර ඇති බවයි.
2017 වර්ෂයේ ජූනි මස 14 වැනිදා බ්‍රිතාන්‍යයවාසීන් පමණක් නොව ලෝකවාසීන් මහත් කම්පාවට පත්කළ දිනයක් ලෙස ඉතිහාසයට එක්ව ඇත.
ජුනි 13 රාත්‍රීයේ බටහිර ලන්ඩනයේ තට්ටු නිවාසයක හදිසියේ හටගත් ගින්නක් සීඝ්‍රයෙන් පැතිර ගියේ පුද්ගලයින් 71 දෙනෙකුට මරු කැඳවමිනි.
උතුරු කෙන්සිංටන් ප්‍රදේශයේ පිහිටි ග්‍රේන්ෆෙල් ගොඩනැගිල්ල වෙලාගත් ගින්නට හසු වූ පුද්ගලයින් බේරා ගැනීම සඳහා ගිනි නිවන භටයින්ට දැඩි පරිශ්‍රමයක් දැරීමට සිදුවුණි.
කෙසේ වෙතත් ගින්න සම්පුර්ණයෙන්ම පාලනය කරන අවස්ථාව වන විටත් එය විශාල පිරිසකගේ ජීවිත බිලිගෙන අවසන්ය.
අනතුරට පත් මහල් විසිහතරකින් යුතු ගොඩනැගිල්ල නිවාස ඒකක 120 න් සමන්විත වුණි.
පවුම් කෝටියක් වැය කරමින් ක්‍රියාත්මක වූ එහි අලුත්වැඩියාව නිම වී තිබුණේ ද ඊට ආසන්න කාලසීමාවක් තුළයි.
ග්‍රේන්ෆෙල් ඛේදවාචකයට දෙවසරක් සම්පූර්ණ වී ඇතත් එහි විමර්ශන කටයුතු තවමත් අවසන් කර නැත.
මේ අතර ග්‍රේන්ෆෙල් ඛේදවාචකය සිහිපත් කරමින් බ්‍රිතාන්‍යය අග්‍රාමාත්‍ය නිල නිවස පිහිටි ඩවුනින් ස්ට්‍රීට් වීදිය හරිත පැහැයෙන් ආලෝකමත් කිරීමට කටයුතු කර තිබුණි.
ජනතාවගේ ඉල්ලීමකට අනුව ගින්නෙන් මියගිය පිරිස සිහිපත් කෙරෙන සැමරුම් සඳහා මෙලෙස හරිත පැහැය යොදාගන්නා බව විදෙස් වාර්තා වැඩිදුරටත් සඳහන් කළේය.
Be First to Comment