ගුවන්තොටුපොළේ දී තම යුතුකම් ඉටුකළ නීතිඥයා ආරක්ෂා කළ යුතුයි – ජාතික සංවිධාන කියයි

කටුනායක ගුවන්තොටුපොළේ පැමිණීමේ දී වීසා නිකුත් කිරීමේ ක්‍රියාවලියේ තමන් දුටු වරදක් උස් හඬින් පෙන්වා දුන් නීතිඥවරයා පොලිසියට කැඳවා අඩන්තේට්ටම් කිරීම පිළිබව ජාතික සංවිධානවල මතය විමසන ලදී. මේ වෛද්‍ය වසන්ත බණ්ඩාර මහතා ඒ පිළිබඳව දැක්වූ අදහස්,

 

“රාජ්‍යයේ අකටයුතුකම් පිළිබඳව හෙළිදරව් කරන රට වැසියන් ආරක්ෂා කිරීම සඳහා ලෝකයේ දියුණු ප්‍රජාතන්ත්‍රවාදී රටවල විශේෂිත නීති පනවා තිබෙනවා. ඒවාට කියන්නේ නලාව පිඹින්නන් ආරක්ෂා කිරීමේ නීති කියලා. නමුත් අපේ රටේ සිදුවෙන්නේ ඊට හාත්පසින්ම වෙනස් දෙයක්. එම නීතිඥ තරුණයා තමාට සිදුවූ අසාධාරණය පිළිබඳව සහ ඊට මුල්වූ හේතුවට අදාළව උස් හඬින් කරුණු දැක්වීම වරදක් වන්නේ කෙසේ ද?.

 

ඔහු එතැන කැළඹීමක් කළේ නැහැ. නිලධාරින්ගේ රාජකාරියට බාධාවක් කළේ නැහැ. ඔහු ඉටුකළේ රටවැසියකුගේ වගකීමක්. එහිදී හඬ උස්ද පහත් ද යන්න වැදගත් නැහැ. 

 

රාජ්‍ය ආයතනයක සාමාන්‍ය ක්‍රියාවලියක් වෙනස් කිරීම නිසා අපහසුතාවකට මහජනයාට මුහුණ දීමට සිදුවුවන්නේ නම් ඒ පිළිබඳව අදාළ නිලධාරීන් පූර්ව දැනුම්දීමක් කළ යුතුයි. එසේ නොකර ගැටලුවක් මතුවූ පසු ඒ ගැන කතා කළ පුද්ගලයා දඬුකඳේ ගැසීම ලැජ්ජා නැති වැඩක්.

 

ඒ ලැජ්ජා නැති මුග්ද ක්‍රියාව මගින් පාලකයන් බලාපොරොත්තු වන්නේ එවැනි ක්‍රියාවන්ට පෙළඹිය හැකි සෙසු පුද්ගලයන් බියවැද්දීම සහ ඔවුන්ට මානසික බාධක පැනවීමයි. ඒ නිසා යුක්තියට ගරුකරන සියලු මිනිසුන් මේ අසාධාරණ බලහත්කාරකමට විරුද්ධ විය යුතුයි.

 

ඊට අමතරව මේ සියල්ල ඉන්දියානු බලහත්කාරයේම කොටසක් ලෙස තේරුම්ගත යුතුයි. ජාතික සංවිධාන හැටියට අපි මේ බියගුළු නිවට ක්‍රියා තරයේ හෙළාදකිනවා.”