හිටපු ජනපති සහ වර්ථමාන ශ්‍රී ලංකා නිදහස් පක්ෂයේ සභාපති මෛත්‍රීපාල සිරිසේන මහතාගේත් , ශ්‍රී ලංකා නිදහස් පක්ෂයේත් උපන් දිනය යෙදී ඇත්තේ එකම දිනයකටය. ඒ, සැප්තැම්බර් මස 02 වැනිදාටය. ඒ අනුව එදාට පාටි දෙකකි. එකක් බර්ත්ඩේ පාටි එකය. අනෙක සංවත්සර පාටි එකය. මෙදා සැරේ මෛත්‍රී පාටි දෙකම ගන්නට හදන්නේ අමුතුම විදියකටය. ඒ දවසක්ද පස්සට කල්දමා ගෙනය.
” පාස්කු වින්දිතයන්ටවත් ගෙවන්න මගේ ළඟ සල්ලි නෑ..මම කොටුවට ගිහින් සල්ලි හොයන්න කැට හොල්ලනවා….” කියපු මෛත්‍රී මෙදා සැරේ 03 වැනිදාට යොදාගත් පාටි දෙකටම සල්ලි හොයන වැඩේ බාර දී ඇත්තේ නිමල් සිරිපාල, මහින්ද අමරවීර, ලසන්ත අලගියවන්න, දුමින්ද දිසානායක ඇතුළු රනිල් රාජපක්ෂ ආණ්ඩුවට ජැක් ගසා සිටින පිරිසකටය.
මෛත්‍රීට ඇති නඩු ගණන වැඩි නිසා මෛත්‍රී දැන් සිටින්නේද රනිල්ගේ ඔඩොක්කුවේය. රනිල්ට මෛත්‍රී හිරේ නොයවා කරගන්නට ඇති දේත් බොහෝය. අමරවීරට රනිල් පොළොන්නරුනව් කෘෂිකර්මය දියුණු කරන්නට උපදෙස් ලබා දී ඇත්තේ මෛත්‍රීපාල කියන විදියටය.
ශ්‍රී ලංකා නිදහස් පක්ෂයේ ප්‍රතිපත්ති වලට පිටුපා යමින් ආණ්ඩුවේ තනතුරුගත් පිරිස 72 වැනි ශ්‍රී ලංකා නිදහස් පක්ෂය සම්මේලනයේ මෙදා ප්‍රධාන කථිකයෝය.
ඔය අතර අදටත් ගෝඨාභය රාජපක්ෂට හිතවත් නිමල් ලංසා ඇතුළු ඔහු විසින් නිර්මාණය කරන්නට යන පාර්ලිමේන්තු කණ්ඩායමද හෙට කොළඹදී පැවැත්වෙන ශ්‍රී ලංකා නිදහස් පක්ෂයේ 72 සංවත්සරයට සහභාගි වීමට සූදානමින් සිටිති. ශ්‍රී ලංකා නිදහස් පක්ෂයේ මහ ලේකම් දයාසිරි ජයසේකර පවා මේ වෙන දේවල් දන්නේ නැත.කුමන්ත්‍රණය ඒ තරමටම සූක්ෂ්මය.
ශ්‍රී ලංකා නිදහස් පක්ෂයට සැබවින්ම ආදරය කරන පිරිසක් තවමත් මේ දෙස උපේක්ෂාවෙන් බලා සිටියි. රනිල්ටත්, පොහොට්ටුවටත් මේ මොහොතේ වුවමනා කරන්නේ වමේ කඳවුර දිය කර හරිමින් ඔවුන්ගේ බලය තහවරු කර ගැනීමය.
ඒ සඳහා වසර 72 ක් පැරණි ශ්‍රී ලංකා නිදහස් පක්ෂය දියකර හැරිය යුතුමය. තනතුරු, තාන්න,මාන්න වලට එදත්,අදත් ලොභ බැඳින පිරිසක් ඒ සඳහා වන කොන්ත්‍රාත්තුව බාර ගෙන තිබේ. රාජපක්ෂවරුන්ටත්, වික්‍රමසිංහටත් මේ තත්ත්වය මහා වාසියකි. කුමන්ත්‍රණකරුවන් විසින් මෙත්‍රීපාලගේ උපන් දිනය දවසේම පක්ෂය විනාශ කිරීම සඳහා රනිල්, රාජපක්ෂවරුන්ගේ මුදලින් ගෙනෙන ලද අයිසිං තවරන ලද විෂ කේක් ගෙඩිය කපනු ඇත. සැබෑ ශ්‍රී ලංකාකාරයෝ ඒ දෙස බලා අත්පුඩි ගසනු ඇතිදැයි කියන්නට තවමත් කල් වැඩිය.
විශේෂ ලියුම්කරුවෙකු විසිනි.
Be First to Comment